Abaholi base-Afrika bahlangana eLondon ukuzodingida iziphakamiso zokuvelela zokuvikela izilwane ezisengozini yokushabalala e-Afrika yonkana.
UDuke waseCambridge, uNobhala Wezangaphandle kanye nabaholi bamazwe ase-Afrika e-Commonwealth bahlangane ngoLwesihlanu zingama-20 kuMbasa ngezingxoxo ezisezingeni eliphakeme zokubhekana nohwebo olungekho emthethweni lwezilwane zasendle ngaphambi kwengqungquthela yamazwe omhlaba elandelayo eLondon ngasekupheleni kwalo nyaka.
Kwaxoxiswana futhi kwadingidwa iziphakamiso ezishisekayo zokubhekana nobugebengu, okuhlanganisa namathuba okuqinisa umthetho onqamula imingcele ukuze izindlovu ezengeziwe nezinye izilwane zihambe ngokukhululeka nangokuphepha e-Afrika.
UNobhala Wezangaphandle u-Boris Johnson uthe:
“Amazwe amaningi ase-Afrika asevele esebenzisana futhi athatha izinyathelo ezinqala zokuvikela nokugcina izilwane zasendle eziyigugu kodwa lokhu kuyinkinga enkulu eqhutshwa amathimba obugebengu bamazwe ngamazwe.
“Kungezinhlelo eziholwa yi-Afrika kuphela lapho sizobunqanda unomphela lobu bugebengu obunyantisayo, futhi sikulungele ukusiza. Lapha e-UK siqhubekisela phambili izinhlelo zethu zokuvinjelwa kokuthengiswa kwamazinyo endlovu, futhi ngo-Okthoba ngizobambisene nomhlangano wamazwe omhlaba eLondon wokulwa nohwebo olungekho emthethweni lwezilwane zasendle.
“Sisonke singakumisa ukuwohloka kwezinhlobo zezilwane ezivelele emhlabeni futhi siqinisekise ukuthi izizukulwane ezizayo akudingeki ziphile ezweni elingenazo izilwane zasendle.”
Kulezi zingxoxo, uNobhala Wezangaphandle unxuse ukuthi kube nemiphumela efiselekayo engqungqutheleni kaMfumfu, ezogxila ekubhekaneni nokuhwebelana kwezilwane zasendle okungekho emthethweni njengobugebengu obuhleliwe, ukwakha imbumba kanye nokuvala izimakethe zezilwane zasendle ezingekho emthethweni. UNobhala Wezangaphandle kanye nabaholi base-Afrika baxoxisane ngamathuba okwandisa izinhlelo zomthetho zikazwelonke nezakweqa imingcele ukuze kubanjwe abazingeli kanye nokumisa abashushumbisi bezilwane zasendle.
Lezi zibalo ziyethusa: izindlovu zase-Afrika ezingaba ngu-20,000 zibulawa abazingeli abangekho emthethweni unyaka ngamunye. Izibalo zezindlovu zaseSavanna zehle ngengxenye yesithathu kusukela ngo-2007 kuya ku-2014 futhi senyuke ngo-9,000% ukubulawa kobhejane eNingizimu Afrika. Izilwane zasendle ezingxenyeni eziningi zase-Afrika zisezingeni elibucayi.
Ama-Mafias kanye namaqembu obugebengu obuhleliwe yiwona aphakathi nendawo enkulu yokuhweba ngezilwane zasendle okungekho emthethweni, ukushayela izilwane kuze kube seqophelweni lokushabalala futhi kucekele phansi ukuvakasha kwezilwane zasendle emiphakathini ethembele kukho.
Ukuhweba ngezilwane zasendle ngokungemthetho kuwubugebengu obuhleliwe obubucayi obunemali engenayo efinyelela kumapondo ayizigidi eziyizinkulungwane eziyi-17 ngonyaka, ngaphezu kwemali engenayo ehlangene yaseCentral African Republic, iLiberia neBurundi. Yingakho i-UK iqhubekisela phambili izinhlelo zokuvinjelwa kokuthengiswa kwamazinyo endlovu futhi ngo-Okthoba izoba nengqungquthela yamazwe ngamazwe eLondon mayelana nokulwa nohwebo olungekho emthethweni lwezilwane zasendle.
