I-LIMA, ePeru - Izimvula ezinamandla kanye nokudilika kodaka ePeru kuvimbe umzila wesitimela oya e-Inca citadel yase-Machu Picchu ngoMsombuluko, nokugcine izivakashi ezicishe zibe ngu-2,000 zivaleleke.
Uhulumeni umemezele isimo esiphuthumayo esifundeni ngoMsombuluko wabe esekhipha izaguga ezingu-20 nezivakashi ezigulayo ngendiza enophephela emhlane edolobhaneni laseMachu Picchu Pueblo eduze namanxiwa, kusho umsakazo we-CPN waseLima.
Izikhulu zikahulumeni zithe izivakashi eziyi-1,954 sezizonke zivaleleke endaweni.
Isitimela ukuphela kwendlela yokuhamba emlenzeni wokugcina wohambo oluya emanxiweni usuka edolobheni laseCuzco kanti isevisi imisiwe ngemuva kokubihlika kodaka ngeSonto.
“Abantu abaningi sebephelelwe ngamadola noma amasoli asePeru bacela ukudla noma amanzi ukuze baphe izingane zabo noma indawo yokuhlala. Abanye bagcwele phama esiteshini belindile,” isivakashi saseMexico u-Alva Ramirez, 40, sitshele i-Associated Press ngocingo sisehostela ngoMsombuluko.
URamirez uthe amahhotela agcwele futhi ajikisa abantu edolobhaneni, uxhaxha lwezindawo zokudlela namahostela abahambi oluqubuke eminyakeni yakamuva nhlangothi zombili zikaloliwe. Izivakashi kumele zidlule edolobhaneni lapho ziya emanxiweni.
Okhulumela iPerurail, u-Soledad Caparo, utshele i-AP ukuthi abasebenzi benkampani yezitimela bebesebenza bengami besusa amatshe nodaka ebebevale ujantshi, kodwa uthe ukugcwala komfula i-Urubamba River kubambezele ukukhuculula.
Izimvula zimile ngoMsombuluko ebusuku kanti uPererail uthe insizakalo ingase iqale ngoLwesibili, "uma isimo sezulu sivuma." Ingeze ngokuthi izindiza ezinophephela emhlane zamasosha ziletha ukudla namanzi edolobhaneni futhi zizobuya ngoLwesibili ukuze ziqhubeke nokuphuma kwabantu.
Le nkampani ithe ibihlinzeka abagibeli abavaleleke ngokudla ngoMsombuluko nangoLwesibili ekuseni, ngokwesekwa yiMachu Picchu Sanctuary Lodge.
Isivakashi saseChile uMartin Squella, 19, utshele i-AP ukuthi abahambi abaningi balala emgwaqweni ngeSonto nokuthi izindawo zokudlela zikhuphule amanani entengo ukuze zisebenzise isidingo esikhulu.
Izimvula ezinamandla zihlasele isifunda saseCuzco ezinsukwini ezintathu ezedlule. Izikhukhula namaslayidi abulala owesifazane nosana futhi kwacekela phansi izindonga zamatshe ezindaweni zemivubukulo eduze kwaseCuzco, inhloko-dolobha yama-Inca yasendulo.
“Lo nyaka awujwayelekile neze. Lesi simo besingakaze senzeke kule minyaka engu-15 edlule. … umfula awukaze uphakame kangaka,” kusho uNgqongqoshe Wezokuvakasha Nezohwebo Lwangaphandle uMartin Perez esithangamini sabezindaba.
