KHARTOUM – Amadoda amabili aseSudan athumba iqeqebana lezivakashi ogwadule oluseningizimu ye-Egypt agwetshwe iminyaka engu-20 umuntu emunye, kusho ummeli wabo ngoLwesithathu.
Oshayasibhamu ababezifihle ubuso bashaqa abathunjwa abangu-19 base-Italy, Germany, Romania nase-Egypt ngesikhathi besogwadule babayisa emngceleni bangena eSudan ngoSepthemba 2008.
Abezindaba bezwe laseSudan bathi ngaleso sikhathi abathumbi bebengamalungu eqembu lamavukelambuso eDarfur, bengeza ngokuthi amasosha aseSudan abulale umholi waleli qembu ngesibhamu.
U-Abdullah Abdurahman no-al-Haj Abdel Jabar, bobabili baseKornoi, eDarfur, baboshwe ngoLwesibili ngemuva kokutholakala benecala lokuthumba, ukusebenzelana nobugebengu kanye nokulwa nombuso, kusho ummeli kammangalelwa uTebn Abdullah etshela abeReuters.
U-Abdullah uthe uzosidlulisela phambili lesi sigwebo. “Bebengewona amalungu eqembu labathumbi. Bayizisulu ngokwabo,” usho kanje.
Ijaji litshele inkantolo yaseKhartoum North ukuthi la madoda womabili angamalungu eqembu lamavukelambuso iSudan Liberation Army's Unity kanti abathumbi babo abayisithupha babulawa ngesikhathi betakula, kusho u-Abdullah.
